भक्तपुर । सरकारले लैगिंक हिंसा निवारण कोषको स्थापना गरेसँंगै अव पीडितले पनि क्षतिपूर्ति पाउनसक्ने भएको छ । हालसम्म पीडकमाथि कारबाही गर्ने तर पीडितलाई क्षतिपूर्ति दिने व्यवस्था रहेको छैन ।
महिला जागरण तथा विकास केन्द्र काठमाडौंले लैगिक हिंसा निवारण कोषकोबारेमा जानकारी दिन आइतबार भक्तपुरमा गरेको अभिमुखीकरण कार्यक्रममा यसबारे जानकारी दिइएको हो । लैगिक हिंसा निवारण कोष र नगरपालिकाको नीतिहरु विषयमा कार्यपत्र प्रस्तुत गर्दै प्राडा शशी अधिकारीले सरकारले केन्द्रस्तरमा र स्थानीय निकायहरुले पालिकास्तरमा कोषको व्यवस्था गर्न सकिने बताइन् । यही कोषबाट पीडितले उचित क्षतिपूर्ति पाउनसक्ने व्यवस्था बनेको उनले सुनाइन् । कार्यक्रममा आयोजक संस्थाका अध्यक्ष डा अनिता श्रेष्ठले महिलाको आर्थिक अधिकार सुनिश्चित गर्ने सम्वन्धमा अन्तर्राष्टिय दस्तावेजहरुमा भएको व्यवस्थाकाबारेमा कार्यपत्र प्रस्तुत गरेकी थिइन् ।
कार्यक्रमको उदघाटन गर्दै भक्तपुरको सूर्यविनायक नगरापालिकाकी उपप्रमुख सरिता तिमल्सिनाले आफनो नगरपालिकाभित्र कोषको व्यवस्था हालसम्म गर्न नसकेको जनाइन् । यसको लागि कार्यविधि तथा सञ्चालक समिति गठन गरी अगाडि वढ्ने प्रतिवद्धता उनले त्यस अवसरमा व्यक्त गरिन् ।
