काठमाडौं । सरकार र जेन जी समूहबीच आन्दोलनका उपलब्धि संस्थागत गर्न सोमबारसम्म सम्झौता गर्ने तयारी भएको प्रधानमन्त्रकिो कार्यालयले जनाएको छ। प्रधानमन्त्री सुशीला कार्कीले शुक्रबार जेन(जीका अगुवालाई सिंहदरबारमा बोलाएर उनीहरूले बुझाएको ११ बुँदे सम्झौताको मस्यौदामाथि छलफल गर्नुभएको हो । छलफलमा प्रधामन्त्री कार्कीले अब धेरै दिन कुर्न नसकिने भन्दै सोमबारसम्म अन्तिम रूप दिन निर्देशन दिनुभयो ।
सम्झौता राजनीतिक दस्तावेज भएकोले त्यसको जिम्मेवारी मन्त्रिपरिषद्ले लिने आश्वासन दिँदै प्रधामन्त्री कार्कीले हस्ताक्षर गरेकै कारण केही बेहोर्नुपरे आफूले नै ब्यहोर्ने पनि स्पष्ट पार्नुभयो । मस्यौदालाई अन्तिम रूप दिने भन्दै शुक्रबार गृहमन्त्री ओमप्रकाश अर्याल र खेलकुदमन्त्री बब्लु गुप्तासहित भएको छलफलमा सहमति जुट्न भने सकेन ।
जेन जी प्रतिनिधिले भदौ २३ र २४ गतेको विद्रोहलाई जनआन्दोलनका रूपमा स्वीकार गर्नुपर्ने, आन्दोलनका घटनामा संलग्नलाई अभियोजन गर्न नहुने र सरकारले गरेको दमको छानबिन र कारवाही हुनुपर्ने लगायतका माग राखेका छन् । जेन(जीले बनाएको सम्झौताको मस्यौदामा गत कात्तिक २८ गते पनि छलफल भएको थियो । तर दुई पक्षबीच कुरा मिल्न सकेको छैन् ।