एमाले अध्यक्ष ओली र नेकपा संयोजक प्रचण्डबीच भेटबार्ता

काठमाडौं । नेकपा एमालेका अध्यक्ष केपी शर्मा ओली र नेकपाका संयोजक पुष्पकमल दाहाल ‘प्रचण्ड’ बीच आइतबार वार्ता भएको छ । दुई नेताबीच जेनजी आन्दोलनपछि सम्भवतः यो पहिलो द्धिपक्षीय भेटबार्ता समेत हो । ललितपुरस्थित एमाले कार्यालय च्यासल नजिकै एक घरमा दुई नेताबीच सौहाद्र छलफल भएको बताइएको छ । सरकारले चुनावको वातावरण बनाउनुको साटो दल र शीर्ष नेताको मानमर्दन गरेको दुवै नेताले समीक्षा गरेको बताइएको छ ।

नेकपा संयोजक प्रचण्डको सचिवालयका प्रमुख गोविन्द आचार्यले समसामयिक विषयमा दुई नेताबीच गहन छलफल भएको बताए । आसन्न निर्वाचनको वातावरण बनाउने,राष्ट्रिय सभा निर्वाचनमा सहकार्यको सम्भावना र सरकारले चुनावको वातावरण बनाउन नसकेको विषयमा छलफल भए पनि निष्कर्षमा नपुगेको बताइएको छ । प्रचण्डले आज दिल्ली जानुअघि ओलीसँग भेटवार्ता गरेका हुन् ।