ललिता निवास प्रकरणमा पक्राउ परेका दुई जना छुटे हाजिर जमानीमा

पृथ्वी पोष्ट संवाददाता
१८, श्रावण २०८०

ललिता निवास प्रकरणमा पक्राउ परेका दुई जना छुटे हाजिर जमानीमा
काठमाडौँ, साउन १८ गते, ललिता निवास प्रकरण पक्राउ परेका दुई जना हाजिर जमानीमा छुटेका छन् ।

समरजंग कम्पनीका तत्कालीन प्रमुख रमेशकुमार पोखरेल र सिद्धिका खेतान छुटेको केन्द्रीय अनुसन्धान ब्युरो (सिआइबी)का एसएसपी दिनेशकुमार आचार्यले बताए । उनीहरूलाई बुधबार छाडिएको हो । पोखरेलको स्वास्थ्य अवस्था ठीक नभएकाले हाजिर जमानीमा छाडिएको एसएसपी आचार्यले बताए ।

सरकारी जग्गा हडप्ने प्रक्रियामा खेतानको भूमिका नदेखिएको भन्दै सिआइबीले उनलाई छाडेको हो । उनको नाममा झन्डै ८ आना जग्गा छ । उक्त जग्गा फिर्ता गर्न तयार भएपछि उनलाई छाडिएको एसएसपी आचार्यले बताए । उनको नाममा झन्डै ८ आना जग्गा छ । जग्गा उनको नाममा देखिएकाले मात्रै राखिएको थियो । अरू अपराधमा संलग्न देखिन्न । जग्गा फिर्ता गर्छौं भनेर निवेदन दिएकाले छाडेका हौं,उनले भने, दुई जना छुटेपछि अब सिआइबीको हिरासतमा २० जना छन् ।

भाटभटेनी सुपरमार्केटका सञ्चालक मीनबहादुर गुरूङ,निर्वाचन आयोगका पूर्वआयुक्त सुधीरकुमार शाह, धर्मप्रसाद गौतम, समरजंग कम्पनीका तत्कालीन प्रमुख लोकहरि घिमिरे,नक्कली मोही देवनारायण महर्जन,तत्कालीन नापी अधिकृत ध्रुव अर्याल र गोपाल कार्की सिआइबीको हिरासतमा छन् । काठमाडौं महानगर वडा नम्बर ५ का तत्कालीन वडा सचिव शिवजी भट्टराई, नक्कली मोही बाबुराजा महर्जन,तत्कालीन नापी कार्यालयमा रहेका घमानकुमार कार्की, समरजंग कम्पनीका तत्कालीन सहायक लेखापाल विनोद पौडेल, भौतिक योजना मन्त्रालयका तत्कालीन सिनियर डिभिजन इन्जिनियर बालकृष्ण श्रेष्ठ, भूमि व्यवस्था विभागका तत्कालीन महानिर्देशक रूद्रप्रसाद श्रेष्ठ, तत्कालीन मालपोत कार्यालयका नायब सुब्बा योगराज पौडेल, खरिदार नारायणदास मिश्र, सकुलनन्द महर्जन र सञ्जय महर्जन प्रहरी हिरासतमा छन् ।

प्रहरीले केशव तुलाधरलाई पनि पक्राउ गरेको थियो । नक्कली भुटानी शरणार्थी प्रकरणमा पक्राउ परेका उनलाई काठमाडौं जिल्ला अदालतले धरौटीमा छाडेलगत्तै सिआइबीले ललिता निवास जग्गा प्रकरणमा पक्राउ गरेको हो । मालपोत कार्यालय डिल्लीबजारका तत्कालीन प्रमुख कलाधर देउजालाई पनि प्रहरीले पक्राउ गरेको हो । उनीसहित १७ जनाले आफूहरूलाई पक्राउ नगर्न सर्वोच्च अदालतबाट स्टे अर्डर लिएका थिए । उनलाई सिआइबीले असार १२ गते नै पक्राउ गरेको थियो । तर स्टे अर्डर लिएकाले प्रहरीले उनलाई छाडेको थियो ।